Во следните три дена бремените жени и лицата повозрасни од 60 години да не одат на работа

Во согласност со најавата на метеоалармот од Управата за хидрометеоролошки работи, почнувајќи од утре и во текот на викендот територијата на целата држава ќе биде зафатена со висока температура од портокалова фаза.
Министерството за здравство по одржаниот состанок на Комисијата за топлотни бранови, препорачува во следните три дена (од петок до недела) од работни обврски да бидат ослободени бремените жени и лицата повозрасни од 60 години, додека сите други лица при појава на каков било здравствен проблем веднаш да се јават кај својот матичен лекар.

На работодавците им се препорачува да го реорганизираат работното време во насока на избегнување активности на отворено во периодот од 11 до 17 часот, како и обезбедување одмор под сенка и доволно течности на секои два часа.
Министерството за здравство препорачува да не се одржуваат спортски активности на отворено во периодот од 11 до 17 часот, а особено се препорачува на установите за згрижување на децата (детски градинки) да не ги изнесуваат децата на отворено и да не практикуваат физичка активност во истиот период.

Во следните три дена Министерство за труд и социјална политика со поддршка од Црвениот крст на Македонија ќе спроведуваат интензивни активности за згрижување на бездомните лица.

За граѓаните од целата држава потсетуваме дека е потребно да ги почитуваат општите препораки за заштита од високата температура, како што се: заштита од директна сончева изложеност, избегнување престој на отворено во периодот од 11 до 17 часот, носење светла и лесна облека, консумирање лесна храна и течности и хигиенски начин на подготовка на храната.

На хронично болните лица им се препорачува редовно земање на препишаната терапија, а при појава на каков било здравствен проблем да контактираат со својот матичен лекар.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.