ВМРО-ДПМНЕ: СЈО е должно да ги уништи сите нелегално прислушувани материјали

ВМРО-ДПМНЕ го повика Специјалното јавно обвинителство да работи во согласност со законот и укажува дека е должно сите нелегално прислушувани материјали веднаш и без исклучок во законска процедура да ги уништи и за уништувањето на материјалите да состави записник.

– Неуништувањето и нивното чување, поседувањето и користењето претставува груба и сериозна злоупотреба на службената должност и е казниво согласно закон. Тие единствено може да се употребуваат за уцени на граѓани и бизнисмени, изјави Бојан Стојаноски од ВМРО-ДПМНЕ.

Тој рече дека СЈО е испостава и инструмент на Социјалдемократскиот сојуз за притисок врз ВМРО-ДПМНЕ и за креирање материјали со кои ќе се оцрни раководството на оваа партија.

– Сите отворени случаи од СЈО се политички конструкции кои немаат допирна точка со правото. Обвиненијата по нив се крајно неаргументирани, со цел да се врши политички прогон на ВМРО-ДПМНЕ инспириран од СДС. Катица Јанева и нејзиниот тим не само што го претворија СЈО во партиска испостава на СДС, туку бесрамно вдомија симпатизери, внуци, роднини и нивни пријатели на државен буџет. СЈО не работи ниту професионално, ниту неселективно, туку претпочита партиска работа, политички активизам и роднински непотизам, истакна Стојаноски од ВМРО-ДПМНЕ.

Додаде дека  таргетот на СЈО е само една политичка партија и стотина луѓе од ВМРО-ДПМНЕ чиј грев, како што рече, не е криминал, туку тоа што останала со народот како единствен бедем за одбрана на државата.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.