И Комисијата за вера распука: Жерновски е бетер од Хитлер

Духовната традиција на македонскиот народ силно се потпира врз вербата во Бога и црквата. Тој вознес и духовно просветлување нè одржувало нас Македонците низ вековите и ние сме обврзани да ги чуваме и зачуваме и во добро и во зло зашто тие се нашата сегашност и нашите победи. Само мрачните сили на деструкцијата се креваат против Бога, црквата и културата.

Господине Жерновски, зар денес и Вие треба да бидете олицетворение на тие мрачни и деструктивни сили? Дури ни Хитлер не се дрзна во екот на Втората светска војна да ги уништува духовните храмови на народите. Зар Вие ќе се ставите над неговата улога? Наместо да градите културни и духовни храмови, Вие ги уривате! Потсетете се само на монахот од Нерези во 1550 година, кој возбудено изјавил: „Ги урнаа сите цркви и духовни храмови во Скопје“. Немојте да нè ставате како народ во улогата на тој средновековен монах и ние да бидеме неми набљудувачи на уривање и неизградба на божјите храмови и со тоа да им испратиме негативен сигнал на меѓународните фактори кои најмногу ја анализираат и ја почитуваат мултикултурноста, разновидноста и верската слобода.

Македонија е нашиот крст, судбоносниот крст кој нѐ тераше да не се колебаме, крстот не признаваше половичност, преиспитување, страв, лелеавост кон градење на македонската нација. Сите црковни градби се вечни, вековити затоа што душите на светците си најдоа уточиште под сводот македонски, вечни се дека и срцата и походот и желбата и љубовта нивна за Македонија беа вечни. Македонската црква е корабија за сите оние кои не се плашеа од смртта, таа е нашето растење, таа е резба на македонскиот дух. Нашата црква е концентрација на убавината, нов импулс за сите генерации и извишување пред сите невозможности.

Господине Жерновски, црквата „Св. Константин и Елена“ е душата и срцето на Скопје. Тука се крштавале рожбите, тука на пат кон вечноста се испраќале најмилите, вршени се причестувања. Ореолот на светоста и божјото просветлување никој не го стекнал со деструкција, туку со градење и отворање нови простори за спојување на народите и на човекот со Бога.

(Интегрален текст од реакција од Kомисијата за односи со верски заедници и религиозни групи во врска со неизградбата на црквата „Св. Константин и Елена“)

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.