Околу 20 деца дневно гинат или се ранети од огнено оружје

Најмалку 19 деца дневно гинат или се ранети од огнено оружје во САД, при што на најголем ризик се изложени момчињата, тинејџерите и Афроамериканците, покажува извештајот на американскиот Центар за контрола и за превенција на болести, објавен во списанието „Педиатрикс“.

Извештајот се заснова на податоци од посмртници и болнички документи за периодот 2002-2014 година.

Констатациите во истражувањето појаснуваат зошто стручњаците го разгледуваат насилството со огнено оружје како закана за јавното здравје. Годишно 1.300 малолетни лица го губат животот од такво оружје, а околу шест илјади се здобиваат со несмртоносни рани.

Во најголем дел од смртните случаи станува збор за убиства или самоубиства, а вооружените напади се главна причина за здобивањето рани што не се опасни по животот кај децата.

Според Катрин Фаулер, раководител на истражувањето од американскиот Центар за контрола и за превенција на болести, овој извештај е „основа за разбирање на проблемот и за разработка на солидно научно решенија“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.