Иванов упати телеграма со сочувство до германскиот претседател за смртта на Хелмут Кол

Претседателот на Република Македонија, Ѓорге Иванов упати писмо со сочувство до претседателот на Сојузна Република Германија, Франк Валтер Штајнмаер по повод смртта на поранешниот германски канцелар Хелмут Кол.

– Хелмут Кол беше импозантна фигура во германската, европската и светската историја. Како голем државник и брилијантен политичар, канцеларот Кол ја препозна историската одговорност и покажа вистинско лидерство и непоколебливи напори и заложби во обединувањето на Германија.  Политичкото наследство на творецот на модерна Германија и промоторот на единствена Европа ќе остане длабоко врежано во меморијата на германската и европската историја и ќе продолжи да биде инспирација за новите генерации на политичари во Европа и светот, се вели во телеграмата.

Република Македонија и нејзините граѓани, пишува Иванов во телеграмата, високо го ценеа и почитуваа канцеларот Кол и неизмерно остануваме благодарни за неговата улога во процесот на осамостојувањето и меѓународно етаблирање на нашата држава, на развојот на односите и меѓусебното почитување меѓу нашите пријателски држави и народи.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.