Меѓу жртвите на терористичкиот напад во Манчестер е и осумгодишната Сафи Роуз Русос, чијашто мајка е тешко повредена.
Таа сè уште не знае дека нејзината ќерка загинала.
Со нив на концертот била и постарата ќерка, која е надвор од животна опасност.
Мајката на најмлада жртва на нападот, Лиза е хоспитализирана во Универзитетската болница во Манчестер и во моментов поради тешките повреди е во индуцирана кома.
Меѓу лекарите што ја следат нејзината состојба се наоѓа и грчкиот пластичен хирург Јоргос Христопулос, кој за грчкиот медиум „Прото тема“ зборувал за нејзината здравствена состојба.
Како што изјави, телото на Лиза е цело со „дупки“ од шајките, шрафовите и металот со кои била наполнета импровизираната бомба.
-Не е во животна опасност, но сè уште нема контакт со опкружувањето. Не ја разбудивме бидејќи ја чека уште една операција наредните денови и од таа причина не знае дека нејзината осумгодишна ќерка е почината – изјави Христопулос.
Овој лекар изјави дека размислува за моментот кога несреќната жена ќе дознае дека нејзината ќерка е меѓу жртвите.
-Претпоставувам дека штом ќе ги отвори очите ќе праша за своите деца, но многу е опасно доколку веднаш ѝ ја кажеме вистината. Тие трите биле многу блиску до експлозијата, што се гледа по раните на телото на Лиза – изјави Јоргос.
Додаде дека и самиот бил шокиран од повредите што ги видел на телата на родителите и на децата што пристигнале во болницата.
-Нема да претерам ако речам дека телата им се искасапени. Ситуацијата беше трагична – изјави Христопулос.
Што се однесува до другата ќерка на Лиза Русос, таа не е во животна опасност и се чувствува добро.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
