Меј: Шкотска нема да учествува во преговорите за Брегзит

Британскиот премиер Тереза Меј одби шкотските власти да учествуваат во преговорите за Брегзит со ЕУ, пренесоа француските медиуми.

-На овие преговори ќе преговарам како премиер на Велика Британија. Ќе продолжиме да разговараме и работиме со шкотската Влада и другите регионални управи, но изборот е јасен кој на 8 јуни ќе седи на масата за преговори – јас или Џереми Корбин, лидерот на лабуристичката опозиција, изјави Меј во Единбург, каде ја престави програмата на Конзервативната партија за парламентарните избори на 8 јуни.

На овој начин таа го отфрли барањето на шкотскиот прв министер Никола Старџен, која сака Шкотска да остане во ЕУ или на заедничкиот европски пазар откако на референдумот од 23 јуни минатата година мнозинството Шкотланѓани гласаа против Брегзит.

-Ако се има предвид дека таа сака Шкотска да се оддели од Велика Британија и да биде во ЕУ, човек може да се запраша од која страна на масата за преговори сака да седне, за Старџен кажа шефицата на шкотските конзервативци Рут Дејвидсон.

Официјалните претставници на ЕУ на 19 јуни се подготвуваат за почетокот на преговорите за Брегзит, но очекуваат датумот да се потврди по британските парламентарни избори, закажани за 8 јуни, пренесоа британските медиуми.

Европската комисија  преговорите со Лондон ќе ги води од името на 27-те држави кои остануваат во ЕУ, кои на министерска средба во понеделник ќе го потврдат мандатот што му го даваат на главниот преговарач на ЕК, Мишел Барние.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.