Алармантно предупредување на тајните служби: Ќе има нереди, нема да работат болниците, банките, ќе настане хаос

Ова предупредување доаѓа откако во петокот, во досега невидениот хакерски напад, беа погодени најмалку 200 илјади корисници во најмалку 150 земји од светот.

Светот наскоро може да доживее глобална хакерска саботажа која би можела целосно да го парализира банкарскиот систем, како и другите важни институции ширум светот, предупредува директорот на холандската тајна служба Роб Бертоли.

Тој предупредува дека може да дојде до нереди и хаос, а саботажата на ваквите институции е исклучително опасна. На конференцијата за информатичка безбедност во Хаг, Бертоли порача дека заканата со сајбер-напади е реална и дека се наоѓа „тука околу нас“.

Уште во 2012-та година, најголемата саудиска нафтена компанија беше на мета на краток хакерски напад, а пред три години беше хакирана украинската компанија за дистрибуција на електрична енергија, по што граѓаните немаа електрична енергија неколку часа. Инфраструктурата ширум светот е поврзана, а тоа има свои предности, но и недостатоци.

-Замислете што ќе се случи ако на ден-два или седум дена се изврши саботажа на целиот банкарски систем“, предупредува Роб Бертоли.

Тој укажува и на можноста за саботажа во сообраќајната мрежа ширум светот или на евентуални хакерски напади на контролите на летовите додека се даваат упатства до авионите. Последиците би биле катастрофални.

Според првиот човек на холандската тајна служба, светот мора да се подготви за идните закани на дигиталното поле, а владите и приватниот сектор мора да соработуваат.

Експертите за информатичка безбедност предупредуваат дека можно е во блиска иднина да има нови хакерски напади и веруваат дека можеби ја откриле врската помеѓу Северна Кореја и последниот сајбер-напад од глобални размери, за кој што никој и натаму нема превземено одговорност.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.