Бесплатни обуки за претприемaштво за млади до 29 години

Млади лица до 29-годишна возраст од денеска може да конкурираат на огласот за бесплатни обуки за претприемаштво што го објави Агенцијата за вработување.

Обуките ќе траат до 1 декември и со нив е предвидено да бидат опфатени 950 лица.

Како што информира денеска на прес-конференција директорот н Агенцијата Влатко Поповски, станува збор за проект поддржан од ЕУ со 300 илјади евра. По обуките, младите ќе можат да изработат бизнис-план и со него да конкурираат за другите мерки за вработување што ги нуди државата.

– Обуките ќе се спроведуваат од страна на консултантски компании на ниво на цела Македонија, а ќе траат по пет дена или вкупно 45 часа, но за да стартуваат неопходно е да се пријават најмалку 10 лица – истакна Поповски.

Оваа мерка, објасни директорот, порано беше во рамки на самовработувањето со грант, но сега се спроведува посебно со цел конкретна едукација и поголем поттик за претприемаштвото.

Одговарајќи на новинарски прашања, Попоски истакна дека во првиот оглас за грант објавен во март годинава од пријавените 1.250, 440 биле лица до 29 години. Досега, 40 до 45 отсто од грантовите се доделени на млади лица што покажува голема заинтересираност, подвлече директорот на Агенцијата за вработување Влатко Поповски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.