„Антолог“ објави четири книги на македонски автори

Издавачката куќа „Антолог“ објави четири нови книги од докажани македонски автори. Еден роман, една поетска збирка, збирка расказа и книга за деца се дел од најновата продукција од домашни автори на оваа издавачка куќа.

Непосредно пред годинашниот Саем на книгата од печат излезе романот „Се гледаме наскоро. Е.“ од Драгана Евтимова и Владимир Лукаш. Во овој епистоларен роман, Евтимова и Лукаш, преку своите писмописци и раскажувачки гласови – Еписторија и Еписторие, соодветно успеваат, освен реалистичната постапка и секојдневјето, да вметнат и нота на надреализам, микрораскази од руски тип налик на оние на Хармс, извадоци од весници и од списанија, книжевни критики, па сè до делови што личат како репортажи од National Geographic. Сето ова придонесува овој роман да се чита и како дневник и како размена на електронска пошта и како лексикон на значења и долги прошетки по сферите на реалното, надреалното, магичниот реализам, чудесното и фантастичното. Убавината во овој роман е во тоа што може да се препрочитува неколкупати и одново да се откриваат симболите и алузиите во приказните.

Дел од најновата продукција на „Антолог“ е и најновиот, четврти по ред, поетски ракопис на поетесата Снежана Стојчевска, кој уште со насловот – „Треба да е лесно“ на ефектен начин асоцира на нејзината препознатлива поетика, во која се потврдува начелото на Р. Тагоре дека за убавите песни имаме чувство дека ние сме ги напишале. Поетската интуиција на Стојчевска ја опева трансформативната моќ на љубовта: токму кога вистински и интензивно се љуби, светот станува убаво место за живеење. Книгата е објавена со финансиска поддршка од Министерството за култура на Република Македонија.

Збирката „Шех Вардар“ од Ленче Милошевска, пак, опфаќа дваесет и пет раскази, поделени во три циклуси. Прозните текстови во оваа книга се лични стории и сеќавања, главно сместени во главниот град, иако дел од нив, оние од детството, се лоцирани и на село, со носталгично и топло чувство за дедото што знаел убаво да раскажува. Книгата опфаќа и случувања за кои поретко се пишува во нашата книжевност, војните и конфликтите по распадот на поранешна Југославија и, во таа смисла, и интимните доживувања во семејството. Она што ја прави особено интересна оваа книга се многубројните раскажувања врзани за старото и новото Скопје. Тргнувајќи од сето ова, книгата ќе им понуди задоволство и на литературната критика и на читателите. И оваа книга е објавена со финансиска поддршка од Министерството за култура на Република Македонија.

Неодамна излезе и „Слики од детството“ од Александар Кујуџиски, збирка со 55 кратки раскази за деца – „слики“ што авторот ги посветил на своето детство „претрчано во родното Пехчево“, вселено во прегратките на областа Малеш, во источниот дел од нашата Македонија. Преку овој зборосплетен ѓердан од вистински згоди и настани, доживеани и повторно оживеани под перото на Александар Кујунџиски, може да се согледа  едно дамнешно детство во исконска сплотеност со природата; со ливадите, горите, ридјето, планињето и со нивниот растителен и животински свет…

Со овие новообјавени дела „Антолог“ уште еднаш се потврдува како издавачка куќа што особено се залага за поддршка на квалитетната македонска литература, отворајќи простор за различни жанрови и автори, практика што ќе продолжи и во иднина.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.