Историски лет за Париз забележа вчера авиокомпанијата „Ер Србија“. Првпат во 90 години историја на српското цивилно воздухопловство, авион полета од аеродромот „Никола Тесла“ со целосно женски екипаж.
Во пилотската кабина на авионот „ербас A-320“ на летот за Париз во 17.05 часот беа капетанот Весна Алексиќ и копилотот Мирјана Стоиљковиќ, а во кабинскиот екипаж беа Мирјана Поповиќ, Силвија Мадиќ, Тања Станковиќ и Елена Љубоевиќ.
Алексиќ е капетан во авиокомпанијата од 2014 година, но првпат е во пилотската кабина со жена копилот.
– Исклучително ми е драго што денес ќе летам со Мирјана и што заедно ја пишуваме историјата на „Ер Србија“ – рече капетан Алексиќ пред летот.
На прашањето како реагираат патниците кога од пилотската кабина ќе им се обрати женски глас, Алексиќ вели дека на почеток им било необично, но дека веќе се навикнати на коментарите што, главно, се позитивни.
Таа додава дека и мажите и жените се еднакво изненадени кога ќе слушнат дека жена го управува авионот.
Алексиќ вели дека неа не ѝ е важно дали во пилотската кабина има маж или жена бидејќи во „Ер Србија“ сите колеги се професионалци со кои добро се согласува и соработува, но сепак нагласи дека ѝ е задоволство што ќе лета со колешка.
Екипажот на „Ер Србија“ има шест жени пилоти, а пред само четири години немало ниту една.
Алексиќ и Стоиљковиќ се двете жени што летаат со „ербас“, една нивна колешка управува со АТР, а уште три со „боинг 737“.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
