Рама: Европа е на крстосница, Балканот на ЕУ никогаш порано не и бил поважен

Албанскиот премиер Еди Рама денеска оцени дека ЕУ, како најуспешна унија во историјата, се наоѓа на крстосница, посебно истакнувајќи го значењето на денешните претседателски избори во Франција за судбината на овој сојуз.

Според Рама, Балканот, инаку означен како буре барут, треба да и се придружи на Европа и таа потреба е посилна од кога било порано, но од друга страна и на Европската Унија Балканот никогаш не и беше попотребен отколку денеска.

Како што додаде, товарот на минатото во регионот е потежок отколку било каде на друго место во земјите на комунистичка Европа, така што напорите на земјите да се приближат кон Европа всушност претставуваат напор да се раскине со минатото, рече Рама во Џирокастро.

Тој изрази надеж дека исходот од изборите во Франција ќе биде во прилог на афирмацијата на Европа каква што ја посакуваме, но додаде дека фактот дека постои поинаква деструктивна алтернатива и дека тоа што за неа ќе гласаат милиони Французи не го отстранува прашалникот кога станува збор за иднината на Европа.

-Во Европа денеска постојат генерации кои не се сведоци на војни што во голема мера е заслуга на ЕУ, укажа Рама.

Но, и покрај тоа, денеска е очигледно и тоа дека кревањето ѕидови кон оние кои немале среќа да се родат во Европа не е алтернатива, рече Рама на свечаноста по повод Денот на Европа.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.