Веќе втор инцидент регистриран во Бугарија со возило „грејт вол“ од кинеската фирма, која отвори своја фабрика во Бугарија заедно со „Литекс моторс“.
Инцидентите, очекувано, и кај двете возила се предизвикани поради слаб квалитет на вградените материјали кај возилата, што е причина за сериозна штета и за доведување во животна опасност на патниците во возилото, предупредува „Високи октани“.
Инцидентот, како што е утврдено од страна на вешто лице, ангажирано од сопствениците на возилата што претрпеле сериозни сообраќајни незгоди, укажува на фабрички дефект на задната оска.
Имено, од слабиот квалитет на изработка на оската, таа се крши и бидејќи кршењето го оштетува целосно задниот пневматик, доаѓа до губење на контрола на возилот и излетување од коловозот.
Иако сериозен проблем, за кој веќе течат два судски спора, од страна на производителот не се преземаат никакви мерки да се повикаат возилата на замена на проблематичните делови, туку се игнорира, а одговорните во „Литекс моторс Бугарија“ молчат и не даваат никакви изјави ниту, пак, се соочуваат со проблемот.
Навистина лош старт на продажбата и на пробивањето на оваа кинеска марка во Европа, а, секако, вакви инциденти не смеат да бидат игнорирани од тие што работат на имиџот на компанијата.
Да потсетиме дека марката е присутна и се продава и на нашиот пазар, па се надеваме дека сопствениците на овие возила нема да ги видиме во слична ситуација како прикажаните возила во Бугарија.
Сепак се надеваме дека возилата ќе бидат отповикани од производителот пред следна катастрофа во која би имало и човечки жртви.
Во меѓувреме, будно ќе ги следиме сите вакви и слични случаи каде што во трка за клиенти, евтините материјали и изработка се причина за сообраќајни незгоди.
Сметаме дека толеранција за тоа не треба да има никаква и не смее ниту еден производител да си земе за право да загрозува човечки животи со цел остварување профит.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
