МНР: Тирана да престане со провокации и да работи на добрососедство

По повод зачестените навредливи изјави и коментари од официјални лица на Република Албанија, насочени кон Република Македонија и нејзините граѓани, во Министерството за надворешни работи на Република Македонија вчера бил повикан на разговор амбасадорот на Република Албанија во Република Македонија.

– На средбата беше потенцирано дека изјавите на претседателот на Владата и министерот за надворешни работи на Република Албанија за двонационалност и менување на уставното уредување на Република Македонија се отворено мешање во внатрешните работи на Република Македонија. Eтикетирањето на Македонците како „Славомакедонци“ е навредливо и дискриминаторски кон Македонците и сите граѓани на Република Македонија – се наведува во соопштението од МНР.

Воедно, се додава, било истакнато дека таквите пораки се сериозна провокација за добрососедството кое сакаме да го негуваме и дека тие прават долгорочна штета на односите во регионот и потткнуваат екстремистичка реторика.

– Она што ни треба во регионот е обединување околу интеграцијата во ЕУ, мир и економски напредок. Затоа, апелиравме да се прекине со провокациите, да се почитува сувереноста и да се работи на планот на добрососедството, за доброто на сите во регионот – стои во соопштението од македонското МНР.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.