Пет лица загинаа, а повеќе од 40 се повредени, во терористичкиот напад кој вчера се случи во Лондон на мостот „Вестминистер“ во реонот на Парламентот. Нападот почна на мостот, каде што маж облечен во црно удри со автомобил во цивили, а потоа се упати кон Парламентот на Британија, при што повреди полицаец пред да биде ликвидиран. Поради нападот, британските парламентарци останаа со часови блокирани во Парламентот.
Меѓу загинатите лица се полицаецот што се обиде да го спречи терористот да влезе во Парламентот, тројца цивили и напаѓачот, кој беше ликвидиран во близина на нападот.
Според Марк Роули, командант на единицата за борба со тероризам во Скотланд јард, седуммина од повредените се во критична состојба.
– Нема да давам коментари за идентитетот на напаѓачот. Но, ние даваме приоритет на верзијата дека е можно да бил инспириран од исламистички тероризам – изјави Роули.
Британската полиција денеска соопшти дека во врска со нападот се уапсени седум луѓе, а на шест локации е извршен претрес. Првичните информации наведуваат на тоа дека напаѓачот дејствувал сам инспириран од меѓународен тероризам.
Објавена фотографија од напаѓачот
Мерките за безбедност во Велика Британија ќе бидат засилени во следните денови. Дополнителни вооружени полицајци ќе бидат распоредени по улиците.
Меѓу повредените се и тинејџери од Франција, кои биле на екскурзија во Лондон, две лица од Романија и петмина од Јужна Кореја.
Британската полиција соопшти дека во следните денови по улиците на британските градови ќе бидат распоредени дополнителен број вооружени полицајци.
Британската премиерка Тереза Меј го осуди нападот оквалификувајќи го како „болен и изопачен“ додавајќи дека изборот на локацијата за напад не е случаен.
– Терористите намерно избраа да удрат во срцето на нашата престолнина каде што има луѓе од сите националности, вери и култури, кои доаѓаат да слават слобода, демократија и други вредности – рече таа.
– Секаков обид да се поразат тие вредности со насилство е осуден на пропаст – нагласи Меј.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
