Охриѓани со порака: Не ни треба платформа од надвор, аманет ни е оставен да ја браниме Македонија!

Граѓани на Охрид и попладнево се собраа на марш низ улиците на градот, како дел од собирите што се организираат низ земјата во рамки на граѓанската иницијатива „За заедничка Македонија“.

Во име на учесниците на протестот говореше Елена Гули, правнука на славниот илинденски војвода Питу Гули, која ги повика сите Македонци да излезат на улиците и да ја изразат поддршката кон татковината.

– Секој да излезе надвор и да покажеме колку сме. Не ни треба платформа однадвор, да си ја браниме државата што со крв е спечалена, што ни ја оставија нашите дедовци, прадедовци. Аманет ни е оставен да ја браниме Македонија, доста е со нејзини поделби, рече таа, изразувајќи поддршка за претседателот Ѓорѓе Иванов за кој рече дека застанал на браникот на татковината.

Група средношколци од Охрид претпладнето излегоа да протестираат за, како што рекоа, зачувување на унитарноста на државата и јазикот и заштита на националните интереси.

Тие прво се упатија кон дворот на охридската гимназија, а потоа и кон средното економско училиште „Св.Кирил и Методиј“, со повик до своите врсници да се придружат кон протестот. Откако тоа не се случи, тие со полициска придружба продефилираа низ улиците во центарот на градот и чаршијата, од каде се упатија кон плоштадот „Св. Климент Охридски“ за по кусо време да се разотидат.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.