Николиќ свика вонредна седница на Советот за безбедност поради ситуацијата во Косово

Претседателот на Србија, Томислав Николиќ денеска свика вонредна седница на Советот за безбедност поради иницијативата на Косово да создаде армија и одлуката на косовскиот Парламент да го прекине дијалогот со Белград до ослободување на поранешниот премиер Рамуш Харадинај, јави ТАНЈУГ.

Седницата ќе се одржи в понеделник, на 13 март.

Претседателот на Косово, Хашим Тачи вчера изјави дека Приштина ќе продолжи да ги реформира безбедносните сили во редовна армија, независно од реакциите на САД и на НАТО. Тој наведе дека Европа не треба да стравува од косовската армија туку од руски воени бази во Србија, од руските авиони МиГ и од руските воени вежби во Србија.

Парламентот на Косово денеска изгласа резолуција со која се бара безусловно ослободување на поранешниот косовски премиер Харадинај, кој е приведен во Франција по распишана потерница од Србија, под обвинение за извршени воени злосторства. Со резолуцијата се бара и прекин на дијалогот со Белград, доколку не биде исполнето барањето.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.