Академик Поп-Атанасов: Само обединет народ и национални црвени линии ќе нè спасат од уништување

Актуелната политичка ситуација во земјава е исклучително неповолна за Македонија. Ваквата политичка ситуација е исклучително неповолна за Република Македонија (нашата единствена држава), но истовремено е исклучително поволна за непријателите на Македонија, за оние коишто посакуваат да не нема како народ и држава.

Во уставот на Република Македонија експлицитно е наведено дека “на целата територија на Република Македонија и во нејзините меѓународни односи службен јазик е македонскиот јазик и неговото кирилично писмо” и дека во некои единици на локалната самоуправа може да се употребува и втор службен јазик под услови и начин утврдени со закон.

–Ваквото решение обезбедува соодветна заштита на македонскиот јазик и истовремено ги задоволува и потребите на другите етнички заедници. Секое друго решение што ќе овозможи промена на статусот на македонскиот јазик и промена на државните симболи ќе биде кобно за опстанокот на македонската држава и македонскиот национален идентитет, вели академик Ѓорѓи Поп-Атанасов во интервјуто за Прес 24.

– Во овие тешки времиња за Република Македонија, не е доволно само еден дел од македонскиот народ да застане во одбрана на својата земја; потребно е сите како еден да застанеме на нејзина страна. Ако не го сториме тоа сега и веднаш, ризикуваме наместо иднина, на својата земја да и обезбедиме сигурна небиднина. Во името на нашите претци и во името на нашите идни поколенија наша должност е да не дозволиме тоа да се случи.

Нашите црвени линии треба да бидат гарант за зачувувањето на македонскиот национален идентитет и на Република Македонија како држава, пред се, на македонскиот народ. Затоа што Република Македонија е единствена наша матична земја. Ние друга Татковина немаме. Тој смета дека за да се обезбеди опстанокот и иднина на Македонија, треба да се дефинираат црвени линии:

1. Не смее да се прифати менување на името на Република Македонија, бидејќи во името на секоја држава е кодиран идентитетот на народот што живее во неа. Со менувањето на името на државата, се менува и идентитетот на народот.
2. Не смее да се менува унитарниот карактер на државата, бидејќи тој е гарант за зачувување на целовитоста на Република Македонија како држава.
3. Не смее да се наруши статусот на македонскиот јазик како единствен официјален државен јазик во Република Македонија. Неговата употреба треба да биде задолжителна во државните институции и во јавните настапи на државните функционери, независно од нивната етничка припадност, вели тој.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.