На плоштадот „Методија Андонов Ченто“ во Прилеп денеска на пладне ќе се одржи Детскиот карневал во рамки на меѓународниот карневал „Прочка“.
Маскирани деца и ученици до 14 години ќе продефилираат на плоштадот, а најавено е и куклено шоу, магионичари, жонглерски и други атракции.
Прилепскиот карневал се одржува по 16. пат, а годинава ќе се одржи и првата научна конференција „Обреди и фестивали под маски на Балканот: традиција, состојба, тенденција“, на која ќе се пријавени учесници од Србија, Бугарија и Македонија, а реферати ќе имаат етнолози од Словенија, Хрватска и од Грција.
Според советничката за култура во прилепската локална самоуправа Снежана Ристеска, на конференцијата ќе се истакне улогата на маската и маскирањето како дел од културната историја и наследството на Балканот низ вековите, а материјалот од конференцијата ќе биде испечатен и издаден од општината заедно со Институтот за старословенска култура кои ја организираат.
Прилепскиот карневал е влезен во Европската асоцијација на карневалски градови и е во организација на локалната самоуправа и Здружението „Прилепски мечкари“.
В недела од 13 часот е дефилето на маските кои стручна комисија ќе ги оценува и ќе ги избере најдобрите. Организаторите најавуваат околу 1.000 маски на учесници од Македонија, Албанија, Србија и Бугарија.
Традиционално, карневалските настани завршуват в понеделник со посен ручек.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
