Конгресот пресече: Лица со психички растројства ќе може да купат оружје

Американскиот Сенат гласаше за блокирање на наредбата на Владата на Барак Обама, која на околу 75.000 лица со психички растројства им попречуваше да купуваат огнено оружје.

Отфрлањето на мерката сега оди на разгледување кај претседателот Доналд Трамп, кој се очекува да ја потпише новата одлука, соопштија американските медиуми.

Наредбата беше обид на Обама да ја засили федералната контрола врз продажбата на оружје по убиството на 20 ученици и шестмина возрасни лица во основно училиште во градчето Њутаун, во сојузната држава Конектикат. Дваесетгодишен маж, кој страдал од Аспергеров синдром и од опсесивно-компулсивно растројство, ја уби својата мајка, по што отиде во училиштето и го изврши масовното убиство и потоа се самоуби.

Наредбата на Владата на Обама бараше администрацијата за социјално осигурување да и ги испраќа имињата на лицата со умствени проблеми.

Но, пратениците, со поддршката на Националната асоцијација за огнено оружје и организациите за правата на човекот се спротивставија на мерката и го поттикнаа Конгресот  да преземе процедура за нејзино укинување. Наредбата може да биде укината кога двата дома на Конгресот со просто мнозинство ќе усвојат заедничка резолуција против неа и потоа претседателот ја потпише.

Сенатот со 57 гласа „за“ и 43 „против“ гласаше за укинување на наредбата на претходната администрација и сега таа го чека одобрението од Трамп.

Според критичарите,  мерката неправедно ги клевети овие луѓе и ги става во нерамноправна положба и е во спротивност со нивното уставно право да носат оружје.

– Доколку има веројатност конкретен човек да пројави агресија заради свое ментално заболување, Владата треба тоа да го докаже, кажа републиканскиот сенатор од Аризона, Чарлс Грасли, кој беше главниот застапник за укинување на нормативниот акт.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.