Атлетик Билбао загуби во последниот меч на Сан Мамеш, стадионот со 100-годишна традиција заминува во историјата

Атлетик Билбао има лоша сезона и со пораз од Леванте се прости од легендарниот стадион „Сан Мамеш“, кој заминува во историјата со 100-годишна традиција. Клубот ќе добие нова помодерна фудбалска арена, а фудбалерите се простија од својот храм со пораз. Хуанлу немаше милост и ја расипа свеченоста со погодок во 90. минута.

Фудбалерите на Барселона се доближија на само еден чекор до бонусот од милион евра што им го вети претседателот Сандро Росел, ако го завршат првенството со 100 бода. Синоќа во каталонското дерби Барса го победи градскиот ривал Еспањол со 2-0, стаса до 97 бода и сега треба да се победи Малага во последната рунда за да се добие џек-потот на Росел. Со триумф Барселона ќе го израмни рекордот на Реал од ланската сезона, кога „кралевите“ под командата на Жозе Мурињо станаа шампиони со точно 100 бода.

Вчера, Реал одигра 3-3 на гостувањето кај имењакот од Сосиедад и им направи голема услуга на фудбалерите на Валенсија за пласман на 4. позиција, последна што води во Лигата на шампионите. Популарните „лилјаци“ славеа со 1-0 против Гранада и на едно коло до крајот имаат два бода повеќе од единствениот конкурент Реал Сосиедад. Во 38. последен круг, Валенсија и гостува на Севилја, а Сосиедад оди на мегдан кај Депортиво, во Коруња, кај тимот што бие битка за опстанок.

Резултати, 37. коло: Атлетик – Леванте 0-1, Еспањол – Барселона 0-2, Реал Сосиедад – Реал Мадрид 3-3, Валенсија – Гранада 1-0, Атлетико – Мајорка 0-0, Валјадолид – Селта 0-2, Хетафе – Рајо Валјекано 1-2, Осасуна – Севилја 2-1, Малага – Депортиво 3-1.

Табела: Барселона 97, Реал Мадрид 82, Атлетико Мадрид 73, Валенсија 65, Реал Сосиедад 63, Малага 57, Бетис 55, Рајо Валјекано 52, итн.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.