Хрватската лекарска комора сооопшти дека за три и пол години земјата ја напуштиле 525 лекари и побара од Владата да преземе мерки со кои ќе ги мотивира лекарите да останат.
Хрватската новинска агенција Хина наведува дека како една од причините за овој проблем е Правилникот за специјализација со кој на специјализантите им се укина обврската да се вратат во болницата или во здравствениот дом кој им давал плата за време на специјализацијата, со што им се овозможува да заминат со значително помала отштета.
Новиот министер за здравство Милан Кујунџиќ ќе треба да најде решение и за санирање на загубите од четири милијарди куни (1 куна=0,13 евра) на крајот на 2016 година.
Тој изјави дека средствата предвидени за здравството со буџетот за 2017 година не се доволни за одржување на постојното ниво на здравствена заштита и најави рационализација на здравствениот систем и реформа на болничкиот систем.
Хина дополнува дека важен успех во 2016 година е постигнат на полето на трансплантацијата, наведувајќи дека со 40 донатори на милион жители, Хрватска е во врвот во светски рамки, прва по бројот на трансплантација на црн дроб и бубрези, а втора по пресадување срце.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
