Миноски ја посети новата Административна зграда на УЈП во Струмица

Министерот за финансии Кирил Миноски и директорката на Управата за јавни приходи, Анастасија Илиевска денеска во Струмица ги посетија шалтерите и одделенијата кои се сместени во новата Административна зграда.

– Ова е административен објект преку кој Министерството за финансии и Владата на Република Македонија настојуваат да промовираат нов концепт за граѓаните во кој повеќе државни инстутиции давaат услуги со што се заштедува време и ја зголемува ефикасноста на сите кои работат во овој сегмент – рече Миноски.

Во административната зграда се сместени Министерството за финансии, Управата за јавни приходи регионална канцеларија Струмица, Катастар, Одделението за имотно-правни работи и матичната евиденција.

– Добрите резултати во работата на УЈП се заслуга на вработените и во најголем дел на даночните обврзници. Со побрзото опслужување на нивните потреби во новиот објект кој ќе се користи, УЈП ќе биде поблиску до граѓаните и ќе ги подобри услугите до нив, рече Анастасија Илиевска, директор на УЈП.

Објектот беше пуштен во употреба во април годинава откако заврши реконструкцијата и пренамената на Старата полициска станица во Струмица, која веќе неколку години беше напуштена. За реконструкцијата одвоени беа финансиски средства, од државниот буџет, во висина од 64.900.000 денари.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.