15 години СОС Детско село: И згрижените деца имаат среќно детство

Под покровителство на Маја Иванова – сопругата на македонскиот претседател и на Австриската амбасада во Република Македонија синоќа во Македонски народен театар беше одбележана 15-годишнината од основањето на СОС Детско село.

– Семејството е столб на секое општество, но што со децата кои ја немаат среќата и можноста да растат во своето биолошко семејство. Што се случува кога судбината ќе си поигра со нив и се оставени сами? Децата кои немаат семејство или пак се отфрлени од своето биолошко семејство немаат огромни барања за да се чувствуваат сакани. Малите моменти на внимание и топлина се доволни детето да се почувствува сакано, рече Иванова.

????????????????????????????????????

Токму во таквите случаи, како што нагласи, се препознава вистинската и незаменлива улога на СОС Детското село во животот на тие деца.

– Пред сè, преку обезбедување на чувство на припадност, заштитеност кај децата згрижени во СОС Детското село, учење на вредности, но и одговорности, создавање на релации кои траат за цел живот, лекување на емоционалните рани, отфрлање на чувството на отуѓеност и оставеност, но и градење самодоверба, додаде таа.

Иванова ги поздрави СОС мајките и СОС родителите, чија улога, како што рече, е од највисоко и исклучително значење.

– Тие со својата грижа и внимание, споделувајќи ги сите радости и таги кои ги носи секојдневието, им помагаат на децата да ја почувствуваат сигурноста на топлиот дом и љубовта од ближните и им помагаат да растат и да се развиваат во стабилна семејна средина, исправајќи ги пред животните предизвици како изградени, силни, независни личности и одговорни граѓани, додаде Иванова.

СОС Детското село, како што нагласи, им дава поддршка на децата во образовниот процес, ги прави подостапни здравствената заштита и основните здравствени услуги за згрижените деца, им обезбедува социјална нега и грижа, ги учи за нивните права, но и се бори истите да бидат подигнати и почитувани на уште повисоко ниво.

– И, најмногу од се, им ги отвора вратите на згрижените деца за еден поубав, посветол и повесел свет, каде и тие имаат своја фамилија, каде и тие имаат и браќа и сестри, каде и тие се безгрижни и ослободени од проблемите на возрасните и на секојдневието, им ги отвора вратите за една светла и стабилна иднина во која и тие ги имаат истите права и можности, како и нивните врсници, рече Иванова.

Според неа, улогата на СОС Детското село е огромна за сите згрижени деца, затоа што од таму, како што рече, заминуваат како независни и изградени личности со вредности, знаења и вештини за самостоен живот.

Посочи дека Република Македонија во изминатиот период е соочена со еден од најголемите хуманитарни предизвици во денешно време, мигрантската криза, а од неодамна и СОС Детско село го прошири своето работење и со децата во прифатните пунктови во пограничните појаси.

Упатувајќи благодарност и повик до сите институции, невладини организации, поединци да продолжат или да се вклучат и да ја поддржат работата на СОС Детско село, Иванова рече дека сите ние имаме обврска да се потрудиме правата на децата да ги направиме приоритет, а децата пак можат да ни возвратат со тоа што ќе научат да уживаат во своето право на безгрижно детство.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.