Финансии: Нето-задолжувањето со утрешната аукција е еднакво на нула

Министерството за финансии денеска во стопанството врати 1,8 милијарди денари по однос на доспеани за исплата државни хартии од вредност.

Во среда по истата основа, Министерството за финансии ќе врати 115 милиони денари. Тоа се вкупно 1,915 милијарди денари кои што Министерството оваа недела ги враќа во стопанството по основ на доспеани државни хартии од вредност, наведуваат од Министерството за финансии во демант на соопштението на дополнителниот заменик-министер за финансии Кире Наумов, кој тврди дека со најавената  аукција се побаруваат за 17 пати повеќе средства од долгот што доспева за враќање.

Од Министерството за финансии додаваат дека аукцијата на државни хартии од вредност закажана за утре е во износ од 1,915 милијарди денари, или идентична сума колку што се враќа неделава – што значи дека нето-задолжувањето по оваа аукција е еднакво на нула.

Министерството за финансии во реакцијата наведува дека ова се јавни податоци, достапни на веб-страната на Министерството и може секој да ги провери, вклучително дополнителниот заменик министер за финансии Кире Наумов.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.