Ново алиби за бегство од избори: СДСМ бара итна седница за законите на СЈО

СДСМ бара итна седница на собранието заради измена на законите кои ги бара специјалната обвинителка Катица Јанева. Пратеничката група денеска до претседателот на собранието Трајко Вељаноски го испратила барањето за седница заедно со предлог измените на два закони и тоа законот за заштита на сведоците и тој за специјалното обвинителство заради продолжување на рокот за подигнување обвинение.

Петре Шилегов објаснува дека станува збор за пресликување на одредбите од законот за кривична постапка кои се однесуваат за одделението за организиран криминал во јавното обвинителство. Повика сите пратеници да ги подржат измените заради непречено работење на СЈО.

Шилегов смета дека собранието има доволно време за итна седница за законите на сјо со оглед на тоа дека за буџетот ќе се расправа 10 дена, а најавите за распуштање на парламентот се 12 октомври. Собранието може да се распушти од 40 до 60 дена од денот на изборите, па пратениците го имаат цел октомври за предлог измените, велат од сдсм

Од кабинетот на Вељаноски за ТВ Нова велат дека го добиле барањето на СДСМ, но со оглед на тоа дека е утврдена секојдневна координација кај спикерот за работа на комисијата за буџетот догодина ова прашање ќе биде отворено на редовната координација во понеделник.

Преку соопштение реагираат од ВМРО-ДПМНЕ, не прифаќаат било каков предлог кој потекнувал, а бил надвор од законот за СЈО согласно Пржино.

-Никакво ново договарање, предоговарање или проширување на веќе постигнатата согласност не може да биде прифатено за разгледување од пратеничката група на ВМРО-ДПМНЕ и Коалицијата за подобра Македонија. СДСМ е портпарол на СЈО, а СЈО е портпарол на СДСМ. Помеѓу тие два субјекта нема никаква разлика. СЈО е дел од СДСМ.

Ја прашуваат Јанева каде се потрошени 60 милиони денари за кои според ВМРО-ДПМНЕ недостасуваат информации во извештајот.

Пратеничката група на ДУИ се уште не ги добила предлог измените на СДСМ, дали ќе поддржат ќе одлучат откако ќе ги разгледаат, вели координаторот Талат Џафери.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.