Натпревари за софтверски решенија за подобрување на јавниот превоз

„Паметна автобуска постојка“ и „Скопски автобуски хакатон“ се двата натпревара организирани во насока на промоција на иновациската дејност, поттикнување на соработката меѓу научно-истражувачките, високо-образовните институции и бизнис секторот и промоција на лабораториите во високо-образовните институции.

Натпреварите ги организираат Фондот за иновации и Технолошки развој, Министерството за образование и наука, Град Скопје и ЈСП Скопје.

Натпреварите, како што соопштија од Фондот за иновации, се отворени за сите креативни индивидуалци, тимови и стартапи кои имаат познавања во областа на развојот и дизајнот на идејни софтверски решенија и сакаат да се вклучат во креирањето и воведувањето на иновации во јавниот сектор, а со цел подобрување на јавните услуги.

Аплицирањето за натпреварите е електронски и трае до 15 октомври годинава.

„Автобускиот хакатон“ е софтверско решение за оптимизација на автобуски линии, во насока за зголемување на задоволството од користењето јавен градски транспорт.

Сите заинтересирани учесници ќе изработуваат иновативно софтверско решение, а со цел оптимизација на бројот на патници во автобусите на линиите 2, 5, 19, 22 и 57.

Во хакатонот може да учествуваат лица, индивидуалци не помлади од 18 години. Понатаму, критериумите за учество ги исполнуваат и тимови од најмалку 2 до најмногу 5 членови, исто така не помлади од 18 години, или сите микро, мали и средни претријатија од сите индустрии и сектори регистрирани како трговски друштва согласно Законот за трговски друштва и регистрирани во Централниот регистар на РМ, кои постојат најмногу 6 години во моментот на аплицирање и кои воведуваат или вовеле иновации во рамки на рамки на своите деловни активности.

Организацијата на натпреварите е поддржана од Факултетот за информатички науки и компјутерско инженерство од Скопје (ФИНКИ), Машинскиот факултет од Скопје, Програмата за развој на Обединетите нации (УНДП), Факултетот за информатички науки и копјутерско инженерство од Скопје, Техничкиот факултет во Битола, Технолошкиот парк при Универзитетот на Југоисточна Европа, Факултетот за информатика од Штип и Факултетот за информатички и комуникациски технологии од Битола.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.