Македонија жали

Македонија жали за настраданите во елементарната непогода што го погоди Скопје на 6 август. Во силното невреме, во кое наврнаа 95 литри дожд на  квадратен метар, животот го загубија 21 лице, а неколку сѐ уште се водат за исчезнати.

Со одлука на Владата, денешниот ден, 8 август 2016 година е прогласен за Ден на жалост во Република Македонија.

– Владата донесе одлука за постоење кризна состојба во скопскиот и тетовскиот регион во траење од 15 дена, како и одлука за доделување еднократен паричен надомест во висина од 300.000 денари за семејствата на загинатите граѓани – се вели во соопштението од Владата.

Како што се наведува, Дирекцијата за заштита и спасување е задолжена целокупната опрема, од сите региони во државата, да ја стави на располагање во кризните региони, а на општините кои располагаат со вакуум цистерни им се препорачува да ги стават на располагање на Град Скопје.

– Владата ја задолжи Дирекцијата за заштита и спасување веднаш да изврши ангажирање дополнителна градежна механизација (скипови, багери и камиони), преку склучените договори за користење градежна механизација од приватните фирми и веднаш да бидат пратени и ставени во функција во кризните подрачја – се вели во соопштението.

Донесена е одлука за доделување нафта за потребите на Дирекцијата за заштита и спасување, ЈП „Македонија пат“, Министерството за одбрана и Министерството за внатрешни работи. Заклучено е Јавното претпријатие за државни патишта да изврши санирање на обиколницата која беше оштетена во невремето.

– Во контекст на поефикасно и побрзо проценување на направените штети, а со цел формирање поголем број на комисии за проценка на штетите, Владата ги задолжи државните институции да делегираат лица кои ќе бидат ставени во функција на општинските комисии за проценка на штети – се вели во соопштението од Владата.

Во текот на вечерта, Владата ќе одржи уште една седница на која повторно ќе биде разгледана моменталната ситуација и се очекува да бидат утврдени нови мерки и заклучоци.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.