Сириските бунтовници ја потиснаа ИД од стратешки важниот град Манбиџ

Борците на бунтовничката коалиција составена од курдски и арапски сили денеска презедоа контрола врз стратешки важниот град Манбиџ, кој досега беше едно од упориштата на џихадистичката група Исламска држава (ИД) во северна Сирија.

Како што јави Сирискиот центар за мониторинг на човековите права, бунтовничката коалиција Сириски демократски сили презела целосна контрола врз Манбиџ и во тек е акција за пронаоѓање на еветуално преостанати џихадисти во градот.

Сириските демократски сили го освоија градот Манбиџ, откако пред два месеци започнаа офанзива против припадниците на ИД во регионот.

Манбиџ, кој се наоѓа во северната сириска провинција Алепо, беше од клучно значење за ИД, бидејќи низ него минува главната патна врска од турската граница до градот Рака, кој важи за престолнина на самопрогласениот „Исламски Клаифат“.

Во исто време, западни медиуми јавија дека бунтовниците успеале да ги потиснат и сириските владини сили во северниот дел на градот Алепо, при што ја зазеле зградата на тамошната воена академија, каде заплениле поголемо количество на оружје и муниција.

Според директорот на Сирискиот центар за мониторинг на човековите права, Рами Абдел Рахман, бунтовниците се на добар пат да го прекинат патот кој ги поврзува сириските владини сили во северниот дел на Алепо со останатата територија под контрола на Дамаск.

Ваквите тврдења на бунтовниците засега ниту се потврдени, ниту демантирани од сириските власти.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.