Амбасадорот на Италија во земјава, Ернесто Масимино Белели на градоначалникот на Град Скопје, Коце Трајановски, му го врачи одликувањето Kомандант од редот Ѕвезда на Италија.
Орденот се доделува врз основа на одлука, донесена од Претседателот на Италија, Серџо Матарела, за придонесот на градоначалникот Трајановски во унапредување на пријателските односи и соработката помеѓу Македонија и Италија, соопштија од Град Скопје.
– Ми претставува голема чест и задоволство во името на Претседателот на Италија, Серџио Матарела да му го врачам ова одликување на градоначалникот Трајановски. На претседателот Матарела му ја посочив одличната соработка која ја имаме со градоначалникот и Градот Скопје, но и неговиот огромен придонес во зближувањето на двете држави и двата народ – изјави амбасадорот Белели.
Градоначалникот Трајановски се заблагодари на амбасадорот Белели за оваа голема чест, велејќи дека истата е резултат на одличната соработка помеѓу него и амбасадорот Белели, како и помеѓу Градот Скопје и Амбасадата на Италија во Македонија.
– Ова одликување е голема чест и признание за мене и истата е само потврда за нашата одлична соработка, како и поттик за продолжување и продлабочување на истата. Сакам да ја искористам оваа пригода да се заблагодарам на амбасадорот Белели за нашата одлична соработка, а сакам и да се заблагодарам за поддршката која Италија ја дава на Македонија на меѓународен план – рече градоначалникот Трајановски.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
