БиХ и Турција на највисоко ниво ги кренаа мерките за безбедност по трагедијата во Ниц

Босна и Херцеговина и Турција на највисоко ниво ги кренаа мерките за безбедност по крвавиот напад во Ница, пренесе Танјуг.

Директорот на дирекцијата за координација на полициските служби во Босна и Херцеговина, Мирсад Вилиќ, информира дека засилените мерки за безбедност биле воведени веднаш по добивањето на информацијата за синоќешниот напад во Ница.

-Оддржуваме постојан контакт со полицискиот претставник во француската амбасада во Босна и Херцеговина, рече Вилиќ.

И турската полиција ги засилила мерките за безбедност низ градовите по синоќешниот атентат во Ница, во кој камион покоси мноштво луѓе, кои на улица го чествуваа Денот на Бастиља, и притоа уби најмалку 84 лица, пренесе турската телевизија НТВ.

Истанбулските полицајци детално ги проверуваат граѓаните кои влегуваат во метрото. Засилени се мерките за безбедност и на аеродромот „Ататурк“, каде припадниците на редот ги претресуваат чантите и куферите на патниците. Околу аеродромот се разместени и полицајци на специјалните единици.

Анкара, исто така, е под тревога. Булеварите и улиците што водат до амбасадите на многу земји, вклучувајќи ги Франција, Германија и САД, се бликирани со полициски прегради. Полицајците изведуваат и почести проверки на различни точки во градот.

До највисоко ниво се кренати и мерките за безбедност на аеродромот во Анталија. Се проверуваат сите автомобили, што влегуваат во реонот на аеродромот. Заради зголемените мерки за безбедност формирана е долга редица од автомобили на влезот на аеродромот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.