Недела е. Велигден. Најголемиот христијански празник, кога го славиме христовото воскресение. Трпезата е наместена, „се смее“, што би рекле повозрасните. Салатата „мимоза“ од свежа марула и јајца е веќе направена. Во салатата „завршија“ сите јајца со кои децата се натпреваруваа чие е поиздржливо. Има и мезе, се е поставено, се чека главниот ручек – дроб сарма со елбасан тава.
Традиционално, за велигденските празници се јаде јагнешко месо во сите негови варијанти. Така, некои семејствата сакаат печено јагнешко, некој повеќе се сладат со дроб-сарма. Пролетта е време кога се јаде дроб-сарма. Мене, лично, дроб-сарма со елбасан тава ми е асоцијација за Велигден. Само на тој ден уживам во овој специјалитет. Можеби бидејќи ретко го јадам, па ми е многу вкусен. Се сеќавам, порано кога баба ми го подготвуваше едвај го чекав празникот. Не знаев што има во дроб сармата, ама знам ми беше и до ден-денес ми остана многу вкусно јадење. Уште и кога ќе добиев парче од елбасан тавата во чинијата, ќе го излапав јадењето со сласт. Некои уживат во ова јадење, некои не го сакаат. За оние кои не го сакаат, на трпезата има печено јагнешко, па слободно нека се послужат. Има и млад кромид и лук.
Состојки:
1,500 кг. јагнешки дроб (црн дроб, бел дроб, срце)
Сол, црн пипер, црвен пипер
200 грама кромид
100 грама масло за јадење
50 грама варен ориз
Китка магдонос
4 јајца
500 грама јагнешка кошулка
Масло за јадење
2 децилитри млеко
Подготовка
Претходно измиениот јагнешки дроб се става да се вари во малку (колку да се покрие дробот) солена вода. Кога е варен, дробот се вади од водата, се оладува и на штица со нож или сатар се сечка на ситни парчиња.
Во посебен сад се става ситно исечканиот кромид и се пржи на масло за јадење. Кога е испржен, во кромидот се додава исечканиот дроб и се оставаат заедно малку да се пропржат. Потоа во дробот се додаваат варениот ориз, црвениот пипер, едно јајце и исечканиот магдонос. На крај тоа се посолува и убаво се измешува.
Јагнешката кошулка добро се измива и се сече на парчиња. Во парчињата се става приготвениот дроб и се виткаат поголеми сарми. Сармите се редат во подмачкана тава и се ставаат во рерна да се печат. Од трите јајца, млекото и малку сол се приготвува прелив со пред крај се прелеваат сармите и потоа повторно се ставаат во рерна да се допечат.
Дроб сармата се служи со кисело млеко.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
