Откриен „мозокот на нападот“ на истанбулскиот аеродром? (Фото)

Турската полиција се сомнева дека „мозок на нападот“ на аеродромот е Илхами Бали, алијас Ебу Бекир, кој важи за главен човек на Исламската држава во Турција, пишува германски „Билд“.

Полиција трага по организаторите на нападите на најголемиот аеродром во Турција. Многу знаци упатуваат кон Исламска држава, а доколку е навистина така, тогаш во планирањето, веројатно, е вмешан овој човек.

Се верува дека Илхами Бали важи за највисок командант на ИСИС во Турција. Тој, меѓу другото, го наредил и нападот на 12 јануари во Истанбул, во кој загинаа 12 лица. Тој организирал и шверц на борци и на материјали од Турција во Сирија за потребите на ИСИС.

Џихадистот, чиешто борбено име во ИСИС гласи Ебу Бекир, и кој се наоѓа на листата на терористи во Турција, важи за лице со добро организирана мрежа. Според тврдењата на турската полиција, организирал транспорт, односно шверц на ранети припадници на ИСИС во турски болници во граничните градови Килис, Газиантеп и Санлиурфи.

Турските медиуми известуваат дека тој го организирал и нападот на двајца бомбаши самоубијци во Анкара на 10 октомври 2015 година. Станува збор за терористички напад на демонстрациите на прокурдската партија ХДП, во кој биле убиени 103 лица, додека 400 биле повредени.

Според информациите на турската разузнавачка служба, во меѓувреме бил ослободен од должноста командант за границата со Турција и моментно се наоѓа во Рака, центарот на Исламската држава. Се претпоставува дека сè уште е во контакт со мрежите во Турција. Доколку врвот на ИСИС решил да изведе нов напад на територијата на Турција, тогаш можно е Ебу Бакир да бил главниот планер. Бекир се наоѓа на потерница издадена од турските власти, а има и награда од 1,4 милион долари за каква било информација што ќе доведе до апсење на овој озлогласен терорист.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.