Повеќе од 10 луѓе повредени во сообраќајката на патот Велес – Езеро Младост (ФОТО)

Девет лица се повредени во сообраќајната несреќа што се случи денеска околу 12 часот на патот Езеро Младост – Велес. Сите повредени се вон животна опасност и се оставени на лекување и опсервација во Хируршкото одделение при велешката Општа болница, велат од велешката служба за Итна помош.

Како што информира за МИА Анита Стојковска, портпарол на СВР Велес, сообраќајката се случила околу 12 часот на патот Езеро Младост – Велес на надолнината каде се судриле две возила кои по судирот се превртиле во шанец.

– Екипи на СВР Велес се на местото на настанот и истрагата е во тек, информира Стојковска.

Д-р Василка Пановска од службата за Итна помош во Велес, информира за МИА дека кај нив сообраќајката била пријавена во 12:15 часот по што веднаш со две екипи и две возила се упатиле на местото на несреќата.

– Сите седуммина повредени се вон животна опасност. Веднаш по укажаната прва медицинска помош сите повредени ги транспортиравме во Хируршкото одделение при Велешката болници каде ги презеде тим од искусни лекари хирурзи и ортопеди, изјави д-р Пановска.

Според првичните прегледи, додаде, повредените се со скршеници на клучна коска, болки во главата и кичмата, нагмечување на лева потколеница, а некои и со болки во вратот.

– Сите пациенти треба детално да се снимаат на рентген и детално да се прегледаат во Велешката болница, за да се види каква е нивната внатрешната состојба и дали можеби имаат и внатрешни повреди, потенцира д-р Пановска.

Во сообраќајката се повредени три девојки и две жени и две помлади момчиња. Повредените се на возраст од триесетина и дваесетина години, а има и една повозрасна жена од 40-тина години.

Од АМСМ информираат дека од 14:15 часот сообраќајот на локалниот пат Велес – Езеро Младост е нормализиран, претходно сообраќајот беше во прекин поради сообраќајката.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.