Фудбал во 15 часот: Полска се крсти во Левандовски, а Швајцарија во Шакири

Втората фаза од Европското првенство во Франција старува со денешниот 1/8-финален дуел (15:00 часот), помеѓу репрезентациите на Швајцарија и Полска.

И двете репрезентации завршија како второпласирани во групната фаза, постигнаа скрони два погодока, но за разлика од Швајцарија, која прими еден гол, репрезентативците на Полска ја зачуваа својата мрежа во првите три натпревари.

Натпреварот во Сент Етјен ќе биде дуел помеѓу две селекции кои имаат подеднакво исти шанси за пласман во следната елиминациска рунда. Фановите на Полска се надеваат дека најпосле ќе проработи бомбардерот на Баерн (М), Роберт Левандовски, кој никако да го најде патот до противничката мрежа, а слични очекувања имаат и швајцарските навивачи, кои пак се крстат во Џердан Шакири и во Харис Сеферовиќ, кој веќе пропушти и повеќе од десет чисти шанси за погодок.

Левандовки има големо влијание врз нашата игра. Од него зависи како ќе играме. Станува збор за фудбалер кој ни е од голема важност, моторот на оваа репрезентација, тој е како локомотива, ја дава потребната моќ. Јас не сум загрижен поради фактот дека се уште не постигнал погодок. Знам дека ќе одигра совршено против Швајцарија, знам дека ќе биде најголема опасност пред противничкиот гол и верувам дека ќе се покаже како клучен за пласманот во следната рунда, изјави предводникот на Полска, Адам Навлака.

И неговиот колега на спротивната страна, Владимир Петковиќ очекува вистински блесок од најголемата ѕвезда во неговиот тим, Џердан Шакири.

Факт е дека играчите кои поседуваат индивидуален талент, имаат голем проблем со играта на ЕП. Сепак, јас сум презадоволен од играта на Шакири, тој не форсира индивидуална игра, тој е тимски играч, фокусиран е на репрезентацијата, а не на сопствената игра. Дава се од себе за својот тим и така ќе продолжи и за време на дуелот против селекцијата на Полска. Ако одиграме тимски, ако бидеме сконцентрирани, тогаш сигурно ќе профитираме и ќе се радуваме на крајот од натпреварот, изјави селекторот на Швајцарија.

Дуелот помеѓу репрезентациите на Швајцарија и Полска стартува во 15 часот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.