Заев повторно ја витка „кичмата“: Македонија ја провоцира Грција, мора да направиме отстапки

Лидерот на СДСМ, Зоран Заев, првпат од почетокот на политичката криза се огласи за спорот за името што Грција го има со Македонија. Во интервјуто за српската агенција „Бета“, Заев вели дека Македонија ја провоцира Грција и дека мора да направиме отстапки за да се најде решение за ова прашање.

Зачудува што Заев токму сега се огласи за ова прашање, кое е многу чувствително за Македонците, коментира „Телеграф“. Веќе подолго време се коментира дека токму оваа криза е креирана и има крајна цел меѓународниот фактор да изврши притисок врз властите во Скопје да се согласат на промена на името.

– Првиот чекор е да престанат провокациите, да се пружи рака на пријателство и да почнат интензивни разговори. Грција може уште 200 години да опстане со ваков проблем. Ние сакаме да бидеме членки на ЕУ и на НАТО. Без решение на овој проблем не можеме да влеземе ниту во ЕУ ниту во НАТО – вели Заев за „Бета“, пренесува „Вечерње новости“.

Нејасно е каде Заев го гледа компромисот што Македонија треба да го направи со Грција ако се знае дека официјална Атина бара едно име за вкупна употреба и промена на Уставот.

Згора на тоа Грција бара и промена на идентитетските прашања, поврзани со јазикот и нацијата и употребата на терминот Македонците.

Пред неколку години Заев исто така рече дека Македонија мора да попушти во спорот за името и да ја свитка „кичмата“ ако биде потребно.

– Мислам дека овде треба некојпат и да свиткаме кичма, како што знаат старите да кажат. Премногу ни е важна економската иднина на граѓаните – изјави тогаш Заев.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.