Јас го одржав зборот, интересот на Македонија ми е на прво место

Јас никогаш не сум се ставал себеси на прво место. Да беше така, веројатно ќе работев нешто друго и ќе имав далеку помирен и поубав живот. За мене државата и граѓаните на Македонија се на прво место, потенцира претседателот на ВМРО-ДПМНЕ Никола Груевски во мега интервјуто за Телеграф.мк.

На следните избори, без разлика дали ќе се одржат во редовниот термин во 2018 година или предвремени, доколку сите партии се усогласат околу термин на кој со сигурност сите би учествувале, тие ќе одлучат кој каде треба да биде. Јас и партијата што ја водам сме спремни за тоа соочување со нив. Да кажеме што сме направиле и што можеме да направиме во иднина, па тие нека ценат, додава претседателот на ВМРО-ДПМНЕ.

Тој објаснува зошто не се врати на премиерската функција кога беше укината техничката влада.

За мене интересите на Македонија се на прво место. Се  согласив на несвојствен договор за мнозинството од европските земји, 100 дена пред избори да се повлечам од позицијата претседател на Влада. Јас зборот го одржав, и мојата обврска џентлменски ја испочитував. За жал, другите страни, пред сè СДСМ, не ги испочитува своите обврски и избега од избори.

Одлучив засега да не се враќам на таа позиција бидејќи не сакам да оставам впечаток дека потезите што ги влечам се само во правец да постигнам некоја лична цел или позиција. Сакам да покажам и дека може да се функционира и поинаку, а пак да се биде успешен и многу корисен, вели Груевски.

Ако се вратев сега на функцијата, многумина ќе помислеа дека можеби ја внесувам земјата во некаков ризик за да бидам премиер. Мене тоа не ми е приоритет. Мене приоритет секогаш ми бил заедничкиот успех како партиски, така и државен. Ако ова придонесе и малку да се намалат тензиите во општеството, тоа ќе е уште подобро.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.