Трагата на исчезнатиот Марјан води кон белградското Циганско Маало

Трагите до исчезнатиот Марјан Станоевиќ (17) од Скопје водат кон Белград. Такви се последните информации што стигнаа до родителите на момчето, кое последен пат е видено пред две и пол недели во близина на Градскиот трговски центар во главниот град на Македонија. Мајката и таткото заминаа во Србија, надевајќи се дека нивниот син ќе го пронајдат жив и здрав, пишува Утрински.

„Добивме информации, кои ни ги потврди и македонската амбасада во Белград дека нашиот син е во т.н. циганско маало во Белград. Мојот сопруг во Србија е веќе од минатата недела, а сега заминувам и јас“, ни изјави вчера мајката на Марјан, Вики.

Таа се жали дека нашила на индиферентност од полицијата, која, како што вели, не се потрудила да го ‘ослободи‘ момчето, иако „добила точна локација каде е“.

„Ми велат дека им давал отпор. Што значи тоа, дека се во контакт со него? Според информациите што ги добивме, Марјан бил однесен во Србија со возрасен човек – Ром, кој го однел во Белград. Како ја минале границата? Имајќи предвид дека полицијата не влегува во тоа ’циганско маало’, мојот сопруг не може сам да влезе и да пребарува од куќа во куќа. Сега одам и јас, па да видиме што ќе сторам. Ми забележуваат дека гласно негодувам на начинот на работата на полицијата кога е во прашање случајот со моето дете, но, еве јавно прашувам, зар е можно речиси три недели да не можат да го пронајдат, да мине легално граница, па и сега да се знае каде е, а да не се реагира“, прашува мајката.

Тинејџерот, кој има 80 отсто оштетен вид на двете очи, последен пат бил виден на 25 април пред ГТЦ каде што собирал пари за своја операција во Ниш. Набргу проструија шпекулации дека малолетникот се качил во автобус на „Ниш експрес“ и заминал кон јужна Србија. Од македонската полиција велат дека ќе ја информираат јавноста веднаш штом случајот добие разрешница.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.