Салати, торти, палачинки: 6 рецепти со варени јајца

Празниците поминуваат и без разлика на тоа колку јајца сваривте, поделивте и искршивте, сигурни сме дека ви останаа уште неколку. Немојте да ги фрлате бидејќи токму вареното јајце е главна состојка на многу вкусни салати и специјалитети.

Пилешка салата

Потребно:

170 гр зелена салата, 100 гр бело грозје, 300 гр сварено бело месо, 2 тврдо варени јајца

За прелив:

2 чаши јогурт, една лажичка сенф, половина лажичка растително масло, 2 лажички мајонез

Подготовка:

Јогуртот, сенфот и растителното масло добро се мешаат. Измиените листови од зелена салата се редат на плитка чинија. Врз нив се става исечкано бело месо и крукчиња од варените јајца, а врз нив се расфрлаат на пола пресечени зрнца од бело грозје. На крај се прелеваат со спремениот сос. Оваа салата се служи исклучиво ладна.

Ница салата

Потребно:

1 варено јајце, 1 домат, 1 краставица, 1 пиперка, туна конзерва, неколку црни маслинки, 1 кромитче, китка зелена салата, малку маслиново масло, сок од лимон, сол, бибер

Подготовка:

Јајцето и доматот ги сечеме на парчиња, краставицата на коцки, пиперката на ленти, а кромидот на крукчиња. Зелената салата се расцепкува на помали делови. Измешајте го зеленчукот, зачинете со маслиново масло, сок од лимон, малку бибер и додајте ги маслинките.

Француска салата

Потребно:

300 гр рокфорт сирење, 2 јајца, 3 домати, 3 лажици грашок, 3 главчиња кромид, 4 лажици тартар сос, 4 лажици павлака, лажица сок од лимон, лажица јогурт

Подготовка:

Сирењето и тврдо варените јајца се сечат на коцки, па им се додаваат сечканите домати, грашокот и кромитчето. Се меша тартар сосот, павлаката, сокот од лимон и јогуртот и со тоа се прелева салтата. Пред да ја послужите оставете ја во фрижидер да се олади.

Салата со варени јајца и шунка

Потребно:

3 варени јајца, 250 гр варена шунка, 1 рендан морков, 100 гр варени макарони, прелив од мајонез, павлака и сенф, сол и бибер

Подготовка:

Белката од јајцата се сечка на коцки, а жолчката испасирајте ја и измешајте ја со ситните парчиња варена шунка. Додајте ги варените макарони, па сето тоа зачинете го со прелив од мајонез, павлака и сенф.

Зачинете по желба со сол и бибер, посипете со рендан морков, украсете со босилек, магданос или крукчиња јајца.

Палачинки со фил од јајца

Најпрво се прават палачинки од компир. Сварете го компирот со лушпа, изгмечете го, помешајте го со брашно, малку сол и од него направете тесто. Тестото поделете го на неколку делови и секој од нив развлечете го на подлога со брашно. Потоа во тава тестото се пече од двете страни.

За филот потребно е тврдо варените јајца и компирите да ги исечкате на помали делови и да ги помешате со малку ситно сечкан кромид и зеленчук по желба. Мајонезот помешајте го со малку оцет, па потоа со сечкани јајца и зеленчук. Посолете, па повторно помешајте.

Наполнете ги палачинките, ставете ги на чинија и прелијте ги со чили сос и павлака.

Торта од пиперки

Потребно:

1 пакување тост – леб, 10 печени пиперки, 400 гр мајонез, 2 павлаки, 4 кисели краставички, 4 варени јајца, 250 гр шунка, 100 гр фета сирење, малку кечап, 150 гр кашкавал

Подготовка:

Помешајте мајонез и павлака, па поделете го на три дела. Во првиот дел додајте исечкани краставички и исечкани варени јајца. Во вториот дел додајте ситно исечкана шунка, изгмечено фета сирење и кечап по вкус. Во третиот дел смешајте рендан кашкавал и уште една павлака. Печените пиперки исечете ги на ленти.

Наредете 6  парчиња леб (без кора), па нанесете го првиот фил. Врз нив наредете ги лентите од печени пиперки, па повторно 6 парчиња леб. Нанесете го и вториот фил, па уште еден ред печени пиперки и на крај покријте го сето тоа со уште еден ред леб.

Целата торта премачкајте ја со третиот фил и украсете по желба.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.