Трајановски во контрола на градежните работи на новиот кружен тек во Топанско поле

Градоначалникот на Град Скопје, Коце Трајановски денеска изврши увид во градежните работи на новиот кружен тек, кој се наоѓа помеѓу улиците Лазо Трповски и Втора македонска бригада.

Викендов поради извршувањето на асфалтирањето оваа крстосница е затворена за сообраќај и сиот сообраќај и движење на автобуси е пренасочено по друга траса.

Автобусите од јавниот градски превоз на автобуската линија со број 9 што сообраќаат кон Топанско поле ќе се движат преку улицата Џон Кенеди и улицата Лазо Трповски, до супермаркетот „Принц“. Во обратна насока, кон Центар, автобусите ќе се движат по улиците Методија Митевски, Благоја Паровиќ и Џон Кенеди  и продолжуваат по својата траса.

Автобусите на линијата со број 18А ќе се движат по булеварите Словенија и Македонско-косовска бригада, потоа по улицата Џон Кенеди и продолжуваат по својата траса. Автобусите со броевите 19, 49 и 81 ќе сообраќаат по улицата Босна и Херцеговина, по крак од улицата Дижонска и продолжуваат по својата траса по улицата Втора македонска бригада.

Новата сообраќајница ќе се формира на нивото на постојниот коловоз и ќе има една сообраќајна лента со ширина од 5,5 метри, којашто ќе ги опслужува сите четири краци на новата сообраќајница.

Во текот на градежните работи се изврши и заштита на постојната водоводна мрежа, на канализациските цевки и на гасоводната цевка, а поставено е и ново улично осветлување.

Градот Скопје за овој проект ќе потроши околу 22 милиони денари.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.