Осветени возобновените конаци на Зрзе

Осветени се и возобновените монашки и владички конаци во манастирскиот комплекс „Св. Преображение“ –Зрзе. На свеченоста во неделата на 6 март присуствуваа бројни гости, како и поглаварот на МПЦ ОА г.г Стефан и владиците Петар и Климент.

– Реконструкцијата на овој духовен центар несомнено ја демонстрира нашата посветеност и нашите заложби да го сочуваме богатото културно наследство кое го поседуваме како држава, да обезбедиме негова соодветна заштита, промоција и достапност до нашите граѓани – порача министерката за култура Елизабета Канческа Милевска при денешната свеченост на осветување и промовирање на реконструираните монашки и владички конак и на партерното уредување на манастрирскиот комплекс Зрзе.

Зафатот на возобновување на комплексот ги опфаќа археолошките истражувања под манастирот, обновата на монашкиот и на владичкиот конак и партерното уредување на 1.300 метри квадратни.

– Зрзе за Македонија е Тавор и Топос на духот кој како во минатото така и денес на човекот на нашата епоха му упатува универзална порака за постојано преобразување, прифаќање и соочување со сопствените креативни потенцијали. Зрзе е креативен амбиент кој токму тука ги изнедрил ремек делата на македонската средновековна уметност, двете антологиски икони, Зрзескиот Христос и Богородица Пелагонитиса од 14-тиот век кои се нераскинлив дел од светската иконописна ризница. Зрзе е органски дел од ранохристијанската духовна структура осведочена во новооткриениот старохристијанскиот комплекс со базилика и гробница на локален мартир од петтиот век. Зрзе е уникатна монашка населба врежана во бигорната карпа со автохтоно монаштво од крајот на деветиот век- рече Канческа Милевска.

Поглаварот на МПЦ ОА, г.г Стефан нагалси дека овој манастир е еден од најрепрезентативните и најзначајни средновековни македонски светилишта.

– Овде, чиниш на секоја педа од земјата напластени се векови национална, културна и духовна историја. Собрани денес на овој свештен собир, крунисуваме едно дело на новата македонска духовна преродба – ги осветуваме возобновените и новите манастирски конаци – изјави г.г. Стефан.

Осветувајќи ги новите конаци, поглаварот на МПЦ ОА г.г Стефан, нагласи дека ниедно духовно дело за историјата и за вечноста не е успешно, доколку зад него не стојат добри и осветени личности.

Градоначалникот на општина Долнени Боше Милошески смета дека за манастирот е направено многу, особено по асфалтирањето на патот до него.

– Со пари од државниот буџет е асфалтиран патот до манастирот во должина од близу 8 километри и ова духовно светилиште е гордост за општината и за Македонија, рече Милошески.

Патот до манастирот се градеше со средства од државата во висина од 80 милиони денари.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.