„Македоника литера“ го објави мегахитот „Тајната во нивните очи“ од Едуардо Сачери

Друштвото за издавачка дејност „Македоника литера“ од Скопје, го објави големиот хит на аргентинскиот писател Едуардо Сачери – романот „Тајната во нивните очи“, во превод од шпански јазик на Дарко Цветаноски. Според овој роман, е снимен истоимен филм кој во 2010 година беше награден со оскар за најдобар странски филм.

Романот е преведен на повеќе јазици, меѓу кои и на англиски, португалски, италијански, француски, германски, кинески, полски, унгарски, бугарски и српски јазик.

Овој трилер, виртуозно раскажан од Сачери, го прикажува долгогодишното разрешување на еден грозен чин од времето на турбулентната и крвава политичка ситуација во Аргентина во 70-тите години на минатиот век.

„Њујоркер“ за романот пишува дека е „интригантен и возбудлив трилер од Аргентина, кој ги проби границите на државата и на континентот, и доби светско признание. Истовремено криминална приказна и приказна за една неостварена љубов“.

„Приказната е раскажана со моќ и страст. Повеќекратно испреплетена со животниот пат на еден интелигентен и силен маж, но на крајот љубовта се покажува како најмоќно средство“ – напиша „Буенос Ариес хералд“.

„Интригантно и честопати фасцинантно… Оваа книга е пред сѐ мистерија со убиство, но фокусот на Аргентина во 70-тите и внатрешната тегоба на протагонистот додаваат слоеви комплексност. Топла препорака за читатели со интерес за напнатост, историја и за човечката психа“ – напиша „Либрари журнал“.

„Тајната во нивните очи“ на Едуарди Сачери е роман во кој низ очите на главниот лик Бен­хамин Чапаро, судски служ­беник од Буенос Аирес, е рас­кажана приказната која оставила најголема трага во неговиот живот.

Во центарот на дејството, кое се одвива во 70-тите годи­ни на дваесеттиот век, во мермерните простории на еден арген­тин­ски суд, се секретарот Бенхамин Чапаро и неговиот алко­хо­лизиран при­ја­­тел Пабло. Приказната на Едуардо Саче­ри почнува три деце­нии подоцна, кога Чапаро, веќе пензио­нер, има доволно време да ја преосмисли и да ја напише таа при­каз­на која не му излегува од умот. Додека се обидува да пишува книга за случајот, триесет години подоцна, пензионираниот Чапаро се присетува на дета­ли­те од истрагата за силувањето и за убиството на младата жена во нејзината спална соба. Како што навлегува во мина­тото, Чапаро исто така се сеќава и на почетоците на него­вата долга и навидум неостварлива и сè уште неоства­ре­на љубов кон Ирене Орнос, некогаш само практикантка, а сега угледна судијка.

Филмската адаптација на овој роман ја доби наградата „оскар за најдобар странски филм во 2010 година“. Сачери, заед­но со режисерот Хуан Хосе Кампанеља, е сценарист на фил­мот. Во 2015 година овој роман доби уште една екранизација, овојпат во холивудска продукција.

Едуардо Сачери (1967, Буенос Аирес) е аргентински пи­са­­тел. Дипломиран историчар, работи како професор по исто­ри­ја. Почнал да пишува во средината на 90-тите години на ми­на­тиот век. Автор е на неколку романи и книги со раскази. Негови попознати дела се: Чекајќи го Тито и други фудбалски приказни (2000); Те познавам, Мендисабал и други раскази (2001); Тајната во нивните очи (2005, роман); Старец кој станува на нозе и други раскази (2007); Араос и вистината (2008, роман) и Хартии во ветрот (2011, роман).

„Тајната во нивните очи“ е прво негово дело објавено на македонски јазик.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.