Обвинение против тетовскиот гинеколог, чијашто пациентка почина минатиот август

Основното јавно обвинителство – Тетово поднесе обвинение против лекар – гинеколог за сторено кривично дело тешки дела против здравјето на луѓето. Поднесеното обвинение против лекарот гинеколог од Клиничката болница од Тетово го товари за несовесно постапување при пружање лекарска помош, поради што е предизвикана смрт на едно лице, се наведува во денешното соопштение од Јавното обвинителство.

Имено, во август минатата година, при вршење царски рез врз пациентка, обвинетото лице не ги презело сите неопходни превентивни мерки за заштита од настанување тешки последици, а кои во конкретниот случај биле многу веројатни. По настанато крварење, лекарот не извршил веднаш медицинска интервенција со што можел да го спречи настанувањето на хеморагичниот шок, туку ја извршил со задоцнување кога веќе било извесно дека здравствената состојба на пациентката е сериозно нарушена. Поради задоцнетото реагирање, пациентката западнала во кома. Во таква состојба била префрлена во Клинички центар во Скопје, каде што и починала.

По прибирање на сите материјални и вербални докази, како што стои во соопштението, надлежен јавен обвинител од тетовското Обвинителство го поднесе обвинението и во исто време до Основниот суд  – Тетово достави и предлог на обвинетиот да му се изрече и споредна казна забрана за вршење професија – лекар.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.