Седум награди за македонските готвачи на интернационален фестивал во Истанбул (галерија)

-„Гастромак“ се врати во Македонија со три златни, три сребрени и „Гран при“, сребрен медал од Истанбул. Се гордеам со вас соколи македонски, напиша Андријана Алачки на својот профил на „Фејсбук“, која беше дел од тимот што нѐ претстави на четиринаесеттиот  интернационален гастрономски фестивал во Истанбул.

Македонскиот национален тим се врати со седум награди. Во поединечна конкуренција освоени се три златни медали и три сребрени медали.  Во екипното натпреварување за наградата Гранд прикс, македонскиот тим го освои сребрениот медал.

Истанбул 2016 е еден од најголемите интернационални фестивали со пропозиции по стандардите на ВАЦС – Ворлд асосиејшн оф чифс сосајатис, во организација на ВАЦС и ЦОЦФЕД – Кукс енд чифс федерејшн оф Турки. Годинава во трите натпреварувачки дена своето знаење и вештини го презентираа 2.000 готвачи и шефови на кујни од 23 земји-учеснички распоредени во 70 различни категории екипно и поединечно. За рангирењето и за изборот на најдобрите ќе се погрижат 100 интернационални судии.

Македонскиот тим се натпреваруваше во конкуренција на готвачи и на шефови на кујни од 23 земји-учеснички на годинашниот натпревар и тоа од Турција, Албанија, Азејбејџан, Бугарија, Хрватска, Грузија, Германија, Ирак, Иран, Израел, Кипар, Кореја, Мароко, Монголија, Нигерија, Пакистан, Романија, Србија, Шведска, Танзанија, Велика Британија и САД.

Љупчо Гиевски, заменик претседателот на ГАСТРО МАК, шеф на кујна во хотел Александар Палас, на фестивалот по гастрономија – Истанбул 2016 беше меѓународен судија во повеќе категории и доби признание во вид на плакета за придонесот во реализацијата и квалитетот на работењето на судиските тимови во кои учествуваше.

За најголемата награда „Гранд прикс“ Истанбул 2016, во екипното натпреварување македонскиот национален тим го освои сребрениот медал. Тимот го сочинуваа тројца натпреварувачи, капитенот Никола Мишковски шеф на кујна во ресторан „Камник“, Марк Де Јонг шеф на кујна и интернационален консалтинг и Зоран Андонов шеф на кујна во ресторан „Албис“ Гостивар.

Пропозициите налагаат во 90 минути тројцата натпреварувачи од тимот да подготват предјадење, главно јадење и десерт. Продуктите што се дадени од страна на организаторот не им се однапред познати на натпреварувачите. Освен подготвувањето на храната тие се должни да го напишат и рецептот на подготвените јадења. Се сервираат по две порции, една за презентација и една за дегустација пред интернационалното жири.

Во Поединечна конкуренција однапред се одбираат категоријата и продуктите. Натпреварувачите имаат 30 минути за да ги подготват двете порции за презентација и за оценување од страна на меѓународните судии и порција за презентација пред публиката на натпреварот.

Во поединечна конкуренција високите одличја ги освоија:

– Зоран Андонов, шеф на кујна во ресторан „Албис3 Гостивар – Златен медал во категорија подготвување јагнешко.
– Марк Де Јонг, шеф на кујна и интернационален консалтинг – Златен медал во категоријата модерна кујна.
– Бобан Билбиловски, шеф на кујна во ресторан „Електра гарден“ Тетово – Златен медал во категорија подготвување риба.
-Никола Мишковски, шеф на кујна во ресторан „Камник“ – Сребрен медал во категорија подготвување риба.
– Бобан Симоновски шеф, на кујна во ресторан „Скара-бар“ – Сребрени медали во двете категории во кои се натпреваруваше, во категориите риба и јагнешко.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.