Универзална сала, амфитеатарот во Скупи, два театри – во тек се капитални проекти во културата

Уникатниот отворен амфитеатар во локалитетот Скупи со 9.000 седишта ќе биде целосно обновен и реконструиран, најави синоќа претседателот на ВМРО-ДПМНЕ Никола Груевски.

-Амфитеатарот е еден од најзначајните објекти од римскиот период во Македонија и еден од најголемите на Балканот и пошироко. Во рамките на Скупи, прогласен за споменик на културата од прва категорија, вршени се археолошки истражувања, а минативе 2 години првите систематски археолошки испитувања. Според некои проценки на научните работници се смета дека амфитеатарот може да прими 8000 до 10000 гледачи, истакна Груевски.

Груевски посочи дека остатоците од овој археолошки локалитет за прв пат е откриен некаде во 60 те години од минатиот век, но досега не биле превземани никакви активности за подлабинско истаржување, а уште помалку за реставрирање и обнова.

-Целта на проектот кој ќе се реализира е целосна реконструкција врз основа на сочуваните архитектонски елементи и преку аналогија со театри кои се блиски до амфитеатарот во Скупи со што би се овозможило ревитализација на објектот и негова презентација пред пошироката културна јавност преку одржување на културни манифестации со капацитет од 9000 места. Министерството за култура веќе изработи проект, а возобновувањето на отворениот амфитеатар ќе започне во првата половина на месец април оваа година откако претходно треба успешно да завршат сите тендерски процедури за избор на изведувач на градежните работи, истакна Груевски.

Видеопрезентацијата на новиот проект може да ја погледнете тука.

Тој посочи дека ќе бидат инвестирани околу 8,5 милиони евра и ова е објект наменет за младите каде што ќе се одржуваат концерти, претстави и други културни настани и ќе биде единствен во целиот регион.

Вчерашниот проект најавен од Груевски е само една во низата најавени крупни инвестиции во културата.

Пред извесен период, беше најавено дека ќе се гради нова зграда за Театар Комедија, Драмски театар, а целосно ќе се обнови и Универзална сала.

-Готов е проектот за Драмски театар во Скопје, во текот на јануари ќе се објави тендер за изведувач за градба. Во јануари веројатно ќе се објави и оглас за изнаоѓање на јавно приватно партнерство за Театарот комедија, доколку тоа не успее тогаш ќе се оди со градба од страна на државата. Објектот кој што треба да дојде на местото на Универзална сала и ќе биде Конгресен центар, проектот е готов и во текот на јануари ќе биде објавен јавен повик за изведувач и четврто се заврши и проектот за театар во Скупи кој што исто така во јануари или февруари треба да биде објавен за изведба, истакна Груевски кон крајот на декември.

Посочи дека станува збор за четири капитални објекти кои треба да бидат градени во текот на 2016-та година.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.