Сопругата на Пепи Бафтировски: Пипи на сон ми се јави и ми рече да пеам

Ава Бафтировска, поранешната сопруга на легендарниот фолк-пејач Пепи Бафтировски, повторно и се враќа на музиката.
Во мај годинава таа ќе дојде во Македонија и ќе сними нови песни во соработка со композиторот Зоран Марковски. Ава дошла на таа идеја откако нејзиниот покоен екссопруг и се јавил на сон и и рекол дека мора да продолжи да пее – објави Вест.

Таа, пишува весникот, вели дека отсуството од сцената тешко и паѓало, а тоа го забележала пред некој ден на еден настап на нејзиниот колега Перо Христов и групата “Биоритам” во Чикаго, САД, кога и самата не можела да одолее, па го земала микрофонот и запеала со нив.

“Долги години сум надвор од музичкиот свет, во Чикаго работам во здравствена установа како менаџер и немам многу слободно време. Веќе неколкупати досега планирав да снимам нешто ново и да го промовирам кога ќе дојдам во Македонија, но постојано одложував. Пред неколку дена овде имаше настап мојот колега Перо Христов и групата “Биоритам”, па атмосферата ме понесе и се разбуди пејачката во мене. Сфатив дека не треба да се бега од тоа што ти е судено, јас едноставно сум родена за да пеам. Сигурна сум дека и Пепи, ако беше жив, ќе ме поддржеше и ќе ми речеше “Ава, што чекаш толку, оди снимај, пеј, развеселувај го народот”.

Ми се јави на сон и ми рече да продолжам на пеам. Затоа договорив средба со мојот композитор Марковски и се надевам дека на пролет веќе ќе бидам во студио и ќе им приредам изненадување на верните обожаватели коишто и по сите овие години не ме заборавија и сè уште ми праќаат пораки со желби да ме видат на сцената”, ни изјави Ава.
Таа и во минатото соработувала со Зоран Марковски којшто е автор на нејзината песна “Столе, море Стојане”, со која го освои третото место на фестивалот “Сенатор”. Вели дека е горда и на својот син Емил кој веќе неколку години оди по стапките на неговиот татко Пепи и се занимава со музика во Америка.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.