Првиот инсерт од филмот „Дедпул“

Првиот инсерт од филмот за невообичаениот антихерој од универзумот на Марвел – Дедпул, за чијашто премиера на 11 февруари веќе можете да купите карти во кинoто „Синаплекс“.

Во првиот инсерт се гледа понежната страна на саркастичниот Дедпул, во љубовна сцена со својата девојка Ванеса на почетокот од филмот.

Дедпул за првпат беше претставен на големото платно во филмот „Икс-мен: Потеклото на Вулверин“ (2009 г.). Бидејќи овој филм не постигна добри резултати на светските киноблагајни, ликот на Дедпул остана во сенка. Тој е единствениот херој кој е свесен дека се наоѓа во стрип/филм и намерно комуницира со публиката. Ова го прави еден од најдуховитите и најинтересните стрип јунаци на сите времиња.

Дедпул го започна животот како Вејд Вилсон, елитен оперативец на специјалните сили кој потоа станува платеник. Кога дознава дека е болен од неизлечива болест, решава да се подложи на тајната експериментална програма со која се здобива со натприродна моќ на исцелување и се претвора во своето алтер его – Дедпул. Во улогата на антихеројот кој тргнува во потрага по човекот кој за малку ќе му го уништел животот се појавува Рајан Рејнолдс, а режијата на филмот ја потпишува Тим Милер.

Во филмот глуми и српскиот актер Стефан Капичиќ кој го толкува едниот од главните ликови – Колосус. Освен него, во филмот се појавуваат и Морена Бакарин, Ед Скрејн, Т. Џ. Милер, Џина Карано и Бријана Хилдебранд.

Режисерот Милер и сценаристите Пол Верник и Рет Риз најавија уште две продолженија за овој несекојдневен јунак. Најочекуваниот филмски хит за 2016 година стигнува во нашите кина од 11 февруари.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.