Георгиевски: Одиме на победа за подобрување на впечатокот

Десното крило на македонската ракометна репрезентација Гоце Георгиевски посакува четири бода од последните два натпревара во групата 1. За денешната пресметка со Норвешка очекува тешка и исцрпувачка борба.

– Норвежаните со победата над Полска потврдија дека не случајно пренесоа четири бода од првата групна фаза. Знаеме за каква репрезентација се работи. Тоа е млада селекција со квалитетни поединци кои се во функција на колективот, а воопшто нема лесни противници на Европското првенство. Ние одиме на победа и на овој дуел и в среда против Белорусија и со две победи да го завршиме шампионатот и да го поправиме впечатокот, изјави Георгиевски.

Според него, Македонија треба да ги запре полуконтрите и контрите на Норвежаните, а за тоа е потребно сведување на минимум на техничките грешки, како и трпелива игра во нападот.

Натпреварот Македонија – Норвешка почнува во 18 часот и 15 минути, а од 20 часот и 30 минути домаќинот на ЕП Полска игра со Белорусија.

Табела група 1: Франција 6 бодови, Норвешка 6, Хрватска 4, Полска 4, Македонија 0 и Белорусија 0.

Двете првопласирани селекции одат во полуфиналето, а останатите играат за соодветен пласман од 5 до 12.место.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.