„Златна бубамара на популарноста“ по 19. пат, првпат во „Метрополис Арена“

„Златната бубамара на популарноста“ ќе се одржи по 19. пат, но првпат во „Метрополис Арена“ наместо во Универзална сала која не е во функција.

„Во третата недела од февруари, традиционално, по 19-ти пат ќе се одржи спектакуларното доделување на наградите на најпопуларните уметници од Македонија и екс-југословенските простори. Наградите ќе бидат доделени по список  и редослед кој е прочистен и потврден од музичко-забавната комисија на Радио Бубамара, со дозвола за увид два дена по денот на настанот, во рамки на одложената ТВ-снимка со среќни ПИМ-мерки.

Добрата забава и хумор се потреба во секое нормално хумано општество и тоа барем еден ден во годината, а додека го чекаме тој убав ден во февруари, ви препорачуваме да продолжите да ќутите по дома и да дишете загаден воздух надевајќи се дека повторно ќе ве огрее „Ново сонце на слободата“, велат од „Буба Мара“.

Режисерот и организатор на оваа култна манифестација, Ранко Петровиќ, како и секогаш сценариото го крие во тајност и најавува дека овој голем празничен медиумски настан, повторно ќе биде во знакот на високоинтелигентна сатира, пристоен хумор, добра музика и аплаузи за најголемите македонски и балкански уметници.

Датумот уште не е прецизиран, првиот можен весел датум за одржување е 18 февруари оваа година.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.