Собраниската комисија за прашања на изборите и на именувањата денеска донесе одлука за формирање Анкетна комисија за скандалот со „фабриката за фалсификување лични карти, пасоши, афери и други документи“. Како што најави, пратеничката група не достави предлози за членови на оваа комисија и не присуствуваше на денешната седница.
Претседателот на Комисијата Зоран Илиоски информираше дека предлози за членови на комисијата доставиле ВМРО – ДПМНЕ, ДУИ, ДПА, а член ќе биде и независната пратеничка Солза Грчева.
– Во моментот кога пратеничката група на СДСМ ќе достави предлози за членови на анкетната комисија итно ќе свикам седница и тие ќе бидат вградени во составот – рече Илиоски.
За претседател е предложен координаторот на пратеничката група на ВМРО – ДПМНЕ Илија Димовски, за потпретседател Љупчо Димовски, за членови од оваа партија Трајчо Димков, Благоја Деспотовски, Лилјана Кузмановска, Андон Чибишев, Благица Ласковска и Драган Данев, од ДУИ Талат Џафери и Ејуп Рустеми, од ДПА Газменд Алиу и независната пратеничка Солза Грчева.
Врз основа на одлуката, анкетната комисија треба да содржи 16 членови, од кои четворица на предлог на опозицијата.
Илисоки реагираше во врска со барањето на пратеничката група на СДСМ за увид во документацијата на Силвана Бонева, член на ДИК, за што беше дискутирано на претходната седница на Комисијата за прашања на изборите и именувањата на која тој не присуствуваше.
– Ако СДСМ уште денеска поднесе барање врз основа на Законот за пристап до документи во рок од 24 часа тие документи ќе ги добие, или втора варијанта, нејзини членови може да се качат кај мене во канцеларија и да ги видат – рече претседателот на Комисијата за прашања на изборите и на именувањата.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
